स्थानीयले नैै सुरु गरे सडक मर्मत

खोटाङ –
खोटाङको हलेसी तुवाचुङ नगरपालिका–२ डिकुवाका स्थानीयले सडक मर्मत सुरु गरेका छन्। दशैं तिहारलाई लक्षीत गर्दै स्थानीयले अवरुद्ध भएको मुलघर–बाघखोर–डिकुवा–चारबोटे ग्रामिण सडक मर्मत सुरु गरेका हुन्। चाडवाडका समयमा ओदोर–दोहोर गर्ने पाहुनाको सहजताका लागि सडकमा खसेको पहिरो पन्छाउन थालिएको वडा सदस्य घनश्याम राईले बताएका छन। सडक अवरुद्ध भएको लामो समयसम्म पनि मर्मतका लागि कसैको साथ र सहयोग प्राप्त नभएपछि स्थानीयले आफै श्रमदान गरेर सडक मर्मत सुरु गरेका हुन्।

गाउँघरमा दशैंतिहारको समयमा बाटोघाटो मर्मत गर्ने प्रचलन अनुशार आइतबारदेखि कुटो, कोदालो, गैती, सावेल लगायतका उपकरण प्रयोग गरेर सडकका ठाउँ–ठाउँमा खसेको पहिरो पन्छाउन थालिएको वडा सदस्य राईले बताए। ‘सडकमा पहिरो खसेकाले हिँडडुल गर्नै मुस्किल परिरहेको छ। तत्कालका लागि मान्छेलाई हिँडडुल गर्ने वातावरण बनाउनका लागि आफै सडक मर्मतमा जुटेका हौँ,’ वडा सदस्य राईले भने, ‘सांसदलाई भन्यौं, स्थानीय सरकारलाई भन्यौँ तर सडक मर्मत गर्न सहयोग नमिलेपछि आफै अघि सरेका हौँ।’ चाडवाडलाई लक्षीत गरेर डिकुवादेखि भुम्जुडाँडासम्मको सडक मर्मत गरिने बताइएको छ।

वर्षापछि डिकुवाको झापा–बल्लुइ–बाईटार सडकको अवस्था उस्तै नाजुक छ। हलेसी तुवाचुङ नगरपालिका–३ च्यास्मीटार र डिकुवा जोड्ने भुम्जु–छोङपाङ–डिकुवा सडक पनि मर्मत नगरेसम्म सवारी साधन हिँड्न सक्ने अवस्थामा छैन। वडाभित्रका टोल–टोलमा बनाइएका अधिकांश सडकको अवस्था झनै दयनीय बनेको छ। अधिकांश सडकमा पहिरो खसेर चिरा–चिरा परेको छ। स्थानीयलाई सडकमा रित्तो हिँड्न पनि मुस्किल परिरहेको छ। माथिबाट खसेको वा तलबाट तानेको पहिरोले सडक भत्किँदा जोगिएर हिँड्नुपर्ने अवस्था बनेको स्थानीय बताउँछन्।

गत असार २७ गतेदेखि साउन ५÷६ गतेसम्म परेको वर्षाका कारण डिकुवा र बाहुनीडाँडाको अधिकांश कच्ची सडक बिग्रिएको हो।सुक्खाग्रस्त क्षेत्र घोषित सो क्षेत्रमा सडक बिग्रिएकाले पिउने पानी समेत ढुवानी गर्न सकिएको छैन। ट्याक्टरमा पानी ओसार्ने गरिएकामा सडक बिग्रँदा पानीकै हाहाकार भएको स्थानीय नेता यानकुमार राईले बताए।

Leave a Reply

Your email address will not be published. Required fields are marked *